ನೆನಪಾಗ್ಯಾದಾ...!!!

ಕಳೆದ ಬಾರಿ ತವರಿಗೆ ಬಂದಿದ್ದ ಗಣಪ ಮತ್ತು ಅವರಮ್ಮ 

ಪೋಟೋ - ಮನುವಚನ್

----------

ನೆನಪಾಗ್ಯಾದಾ...!!!

ನನ್ನಪ್ಪ ನನ್ನಮ್ಮ..

ಕರೆ ಮಾಡಿ ಕರೆದ್ಯಾರ 

ಹೊಸ ಸೀರೆ ತಂದೀನಿ

ಕುಂಕುಮ ಅರಿಶಿನ-ಬಾಗೀನ

ಕೊಂಡೊಯ್ಯು ಬಾ ಎಂದಾರಾ...

ನನ್ನಣ್ಣ-ಅತ್ತಿಗೆ

ಮಾತಲ್ಲೇ ಬೈದಾರ

ಪ್ರತಿ ವರುಷ ಬರುವವಳು

ಈ ವರ್ಷ ಬಲು ಬೇಗ 

ಬಂದು ಹೊರೆಟೆಬಿಟ್ಟೆಯಲ್ಲಾ ಎಂದಾರಾ...

ನನ್ನಕ್ಕ-ಬಾವ

ಪ್ರತಿ ಸಲವು ಬಂದಾಗ

ಜೊತೆ ಜೊತೆಗೆ ಇದ್ದೇವು

ಹೋಳಿಗೆ ಹೂರಣದಿ

ನಿನ್ನ ನಗುವಾ ಕಂಡೇವು...

ಎಲ್ಲ ಪ್ರೀತಿ ಬೈಗುಳದಿ

ಊರ ಹಾದಿಯ ನೋಡುತ

ಮನಸ್ಯಾಕೋ ಒದ್ದಾಡಿ

ತವರೂರ ನೆನಸ್ಯಾದಾ..

ನಾನೊಬ್ಬ ಮಗಳೆಂದು

ಬಾವ ಕೊಡಿಸುತ್ತಿದ್ದ ಬಳೇ

ಅಣ್ಣ ಕೊಡುತಿದ್ದ ರೊಕ್ಕಾ

ಅಮ್ಮ ನೀಡುವ ಬಾಗಿನ

ಅಕ್ಕ ತೋರಿಸಿಕೊಡುವ ಪೂಜೆ

ಅತ್ತಿಗೆಯ ಕೈರುಚಿ ಅಡಿಗೆ

ಎಲ್ಲ ನೆನಪಾಗಿ 

ಕಣ್ಣು ಯಾಕೋ ಜಿನಿಗ್ಯಾದಾ..!!

ಎಲ್ಲರಿಗೂ ಗೌರಿ-ಗಣೇಶ ಹಬ್ಬದ ಶುಭಾಶಯಗಳು....