ಬಂಧನ

ಅವನೊಳಗೆ ಬಂಧಿಯಾಗುವ ಇಚ್ಛೆ

ಬಲವಾದ ಬಂಧನದ ಬಿಸಿಯೂ ಹಿತ

ಸ್ವರ್ಗ ಕಾಣ್ಪೆನೆಂಬ ತುಡಿತದ ಈ ಮನ

ಹುಡುಕುತಿದೆ ಬಾಹುಗಳ ಸ್ಪಂದನ

ಆಯ್ಕೆಯ ಸುರಕ್ಷೆ ನಂಬಿಕೆಯೊಳಿರಲು

ಬಿಗುಮಾನದ ಅಂಚು ದಾಟಿರುವೆ

ಪಲ್ಲವಿಗಳ ಜೋಡಿಸಿ ಹಾಡು ಹೆಣೆದು

ರಾಗಾಲಾಪದಿ ತೋಳುಗಳ ಸಂಧಿಸುವೆ

ನಿಶ್ಚಿತ ಬದುಕು ಅವನೊಟ್ಟಿಗೆ

ಎಂದು ಬರೆದ ಅಕ್ಷತೆಗಳ ದೀಕ್ಷೆ

ಬಯಕೆ ಬಳ್ಳಿಯಲಿ ತೇಲುವ ಸಮೀಕ್ಷೆ

ಪ್ರಫುಲ್ಲತೆಯಲಿ ಹಾರೈಸಿತು ಮನದ ಒಟ್ಟಿಗೆ 

ಬಂಧನ ಅದು ಪ್ರೀತಿ ಸಂಕೋಲೆ

ಬದುಕಿರುವವರೆಗೂ ಸ್ವರ್ಣಗೃಹ

ಆಪ್ತತೆ ಮಿಂಚು ಬೆಳಕಿನ ನೆಲೆ

ಅವನ ಹೃದಯ ಒಲವಿನ ಕಾರಾಗೃಹ